【智取大市】特價待變正常價(晉佳)
港股晉佳
睇恒指月線圖,將08金融海嘯低位,同埋2016年2月熔斷股災低位,加埋周五低位,形成一條上升支持線,呢3點係恒指市賬率1倍水平。
呢個世界永冇話寫包單1倍市賬率自然有承接,但在於港股而言,呢3次市賬率跌到1倍,都係由流動性危機逼出嚟,如果流動性危機解決,正常恒指會返去25000點至3萬點嘅range,即係之前市賬率1.1倍至1.3倍,計埋業績期後賬面值roll over因素,流動性正常日子嘅恒指range理應推高到26000點至31000點。
講緊上次市賬率接近1.3倍係年頭嘅事,要日後見返1.3倍,反映嘅係冇晒武漢肺炎同埋冇晒流動性危機嘅某個興奮日子,升凸就係超買。
流動性危機令港股突然偏離應有估值range,一次性危機製造特價,吸引資金大手撈底。周五V彈成交逾2000億,要再推低個市,就要有更大力度嘅沽盤。
周日杜拜跌3%,合理反映周五全世界市況,偏弱但未至失控,而家睇周一環球股市似買大細,但冇失控之下,港股應未至周一直插去上周五低位,如果流動性危機紓緩到,先真係有機會挾淡倉。
之前預計港股上周先跌後升,最終「後升」只出現半個交易日,只能承認估錯晒,好彩嘅係,個股跌勢唔算慘烈,一周跌幅普遍一成多啲,大波幅市之下算係能承受水平。而美股以期貨計,高位至低位跌幅三成,相比87股災都係最多跌36%,以今時今日美股市場深度計,今次都夠誇啦啩。
-----------------------------
【武漢肺炎】專頁 全民自救 抗疫資訊盡在《蘋果》
-----------------------
屬於香港人的移民攻略
立即登入
【全球樓行】 Dream House零距離