特首林鄭月娥7.1酒會後與部份傳媒會晤時表示如可掌握好土地供應狀況，當局考慮將公私營房屋比例由六比四改為七比三，爭取今年10月施政報告交代。

就此，經濟學家關焯照認為，如果沒有足夠土地，而夾硬將公營房屋比例提高至七比三，無加大個餅但夾硬切割，結果是減少私樓供應，增加公營房屋供應，「咁私樓價格咪升到天咁高囉！幾何式咁升！爆升！」公營房屋住戶難向上流，難以流轉私樓市場，近乎永遠停在資助房屋階梯。

他稱，就算個餅加大，每年供應量增加，但公營房屋長期短缺，要追返公營房屋條數。他自問自答：「當時為何不夠膽這樣切？因為無增加土地情況下，要補救公營房屋，就要抽走私營房屋的地皮，私樓價格一定飆得好緊要。資助房價格不會升太多，因為脫鈎，但如果私樓升得好急，用負擔能力計，52折未必滿足到市場，日後會減到4折…35折…3折…折頭越來越深，扭曲市場，結果政府製造沒有預計到的需求，令抽資助房屋的機會更低。」

「有啲人原先唔抽居屋，但都可能透過家人去抽，甚至好多居住海外的香港市民人士都返來抽。3折買樓喎！啟德喎！400呎，住都好呀，隔離成千萬，我住成世，有居住權，死左仲可以留俾啲仔女。無業權啫，有居住權呀嘛。政府製造咗好多自己當時見唔到的需求，香港好多人有仔女，結果18歲學生都去抽，點解？平呀嘛，隔離賣1萬蚊呎，我先三千蚊呎。呢啲等於一個預測唔到需求。」

私樓價狂升，折頭越來越深，人工追不上，資助房屋地皮被鎖死，日後好難補到地價，起樓後以3折出售，政府財政損失好大。價值100億的地皮，3折賣出新居屋，拎返三、四十億，60億變相唔郁得。無人補到地價，啲錢攞唔到。除非大冧市，政府蝕住同市民攞返。

他重申，新資助房屋折扣加大，會令更多人去買，但私樓價不斷咁升，買咗居屋後，絕大部份都走唔郁，無法向上流。日後會造成好多問題，好多後遺症，但未至於「窮人社區」、「悲情城市」，相信城市規模會造好。始終本港住宅供不應求，抽新資助的機會率低咗，排隊時間長咗！

記者:陳家雄

全球樓行 Dream House零距離
https://hk.feature.appledaily.com/overseasproperty