御泰中彩（555）應該就快公佈2012年度業績，如冇意外，純利表現應該暴漲。御泰主打祖國彩票業，集團單係2012年半年度，純利就增長咗四成到4.4億銀，而喺御泰半年業績打後，祖國彩票業繼續好景，全國銷售額下半年增幅，同樣keep住去年43%。仲要咁睇，御泰主打瓣數，包羅晒上、下游業務，又兼具體彩及褔彩兩個項目，保守計，集團上年下半年，起碼可以維持到市場嘅增幅。而踏入2013年，祖國1月彩票毛收入又翻半番到248億人仔，靚仔到不得了。唔好多計，御泰2012年度純利起個孖到8.8億銀，PE得6倍，2013年度純利上望10億銀，PE得番5字頭單位數。買御泰，博股價見1字頭，講緊要翻半番，到時，集團2013年度預期PE，仲係單位數。

鴻興憧憬新業務

鴻興印刷（450）PB 0.5倍，場內印刷股平均PB 1倍樓上。再講，集團呢期搞咗個專利電子書店，呢壇製作若果有聲有色，第時增值包括係咪可以資本化，亦係可大可小。Before that，鴻興相對同業PB平均折讓高達五成以上，21日業績一過關，已經大條道理博PB收窄。鴻興見2字頭，現價升幅三成，未有耐上到同業水位。

錢雋