投訴人梁生話，當日同40幾個團友參加咗湯大狀呢個88蚊超值團，當佢哋去到深圳南山區一個商場一家賣玉石珠寶嘅舖頭時，佢同朋友行入去睇睇。梁生話，唔入猶自可，一入去即刻被店員請咗入一間黑房，叫佢哋望住牆上一啲寶石。
據梁生講，唔知點解佢哋望住嗰啲珠寶折射出嚟嘅古怪光線約10分鐘後，兩人即時暈陀陀，後來就用4,000元人民幣，買咗近20件首飾。
梁生同朋友事後覺得唔對路，返港後即刻去當舖驗吓堆首飾，發現全屬假貨。
梁生諗起間舖頭講過，如有不滿可以去佢哋喺香港一間國貨公司嘅攤位退錢，於是即時撲去諗住要回水，又發現個攤位根本唔存在。梁生最終去埋差館報警，當值差人同佢講「我哋冇興趣處理呢樣嘢」。梁生話惟有向消委會求助，消委會就叫佢搵番湯大狀幫手，因為湯大狀係立法會議員喎。
湯大狀接到呢宗投訴後，即時派助理專門跟進，並去信當日合辦呢個團嘅旅行社，要求旅行社處理梁生投訴，避免類似事件重演。旅行社接信後回覆湯大狀，話已與涉事店舖聯絡了解，得到店舖同意退貨同換貨，又話如果梁先生有需要，可以派人去深圳關口，陪梁生去舖頭退貨。