日本樂隊LUNA SEA兩位成員SUGIZO、INORAN展開亞洲巡迴騷，日前合體集港假九展Music Zone開騷兩場，獲大批樂迷捧場，SUGIZO更連續兩日收到粉絲送上大束鮮花，當中有99支紅玫瑰，估計每紮花價值數千港元，SUGIZO尾場更將鮮花放在舞台兩側，夠晒搶眼。

開場時，SUGIZO孖INORAN合奏揭開序幕，之後SUGIZO就作個人演出，並配上投射影像，利用電結他及拉小提琴大玩迷幻，其間SUGIZO更大派飛吻，又走近鮮花索咗兩吓，更把飲過嘅支裝水拋落台淋濕歌迷，最後更拿出手機拍fans。當輪到INORAN率領樂隊登場，佢用廣東話講：「你哋好嗎？」、「大家玩得high啲！」樂隊成員亦大搞氣氛，RIZE前低音結他手小川剛史就自認十分變態，來港多次嘅INORAN就表示：「香港好正呀。好想再嚟，係咪會等我？絕對？」去到尾聲，SUGIZO再度出場同INORAN帶領拍檔鞠躬謝幕，二人更透露：「See you in October！」據知佢哋係預告LUNA SEA將於10月份將會齊人再訪香港。