當年今日
關於我們

上戶彩喊住做網球女將 翻身有望

蘋果日報 2004/01/10 00:00


少女偶像上戶彩雖然只得十八歲,但已經慘被掛上收視毒藥之名,我羅拉見佢今次再孭飛主演改篇自三十年前嘅超有名漫畫《網球女將》,都望佢揀啱劇拍,因為今次真係彩妹嘅最後一擊啦!
怕再輸嘅彩妹最近主動要求唔放假,每日唔係拍劇就練波,又重新睇過漫畫原著,希望演得番原著女主角岡廣美嘅神髓。彩妹自爆:「之前嗰啲淨係就鏡頭,今次起碼要打中個波㗎!」

壓力大行為失常
彩妹前日喺呢個劇嘅記招上話:「我覺得我同漫畫角色最似嘅地方,係一樣好怕輸同埋好鍾意喊!」咁不期然令我羅拉記起最近佢嘅雜誌訪問感歎咁講過:「我一唔開心就會喊,尤其係得我一個人嘅時候,早排重喺車度用條頸巾包到上眼係咁喊,因為俾人影到就大件事啦!」細細個就受咁大壓力,難怪上個月有傳彩妹喺片場行為失常啦。
不過咁,我羅拉都幾睇好套劇收視唔會太差,但為劇中做彩妹死對頭、蝴蝶夫人嘅松本莉緒,同埋教練內野聖陽,造型同漫畫一樣咁型,以日本人咁迷漫畫嘅傳統,相信彩妹今鋪有得救。