韓國天團BIGBANG成員太陽，今日去完尖沙嘴SOGO主持開幕禮後，下晝3點就轉場去銅鑼灣分店，舉行簽名會，由於係喺21樓室內舉行，所以冇受佔中清場影響。

太陽心情好靚，以輕快步伐跳上台，仲擺大鵬展翅甫士，又用英文同在場100位粉絲講loveyou。問到今次首次來港舉行簽名會近距離接觸粉絲感受如何？太陽話：「好有意義。」而當司儀問佢鍾意咩聖誕歌，可唔可以唱番兩句時，太陽就諗咗陣，然後即席唱咗兩句英文聖誕歌，但唱唱下佢就話唔記得歌詞，場面搞笑。

之後粉絲輪流上台拎出太陽隻新碟畀佢簽，其間仲唔理大會勸喻，爭取機會同太陽合照，有粉絲仲整心心手勢示愛添。太陽亦好有心機，逐人寫埋粉絲個名喺隻碟度，又同佢哋握手。

活動結束時，太陽問粉絲下月會唔會去佢香港的個人演唱會，全場即刻答會，冧得太陽好開心。