社會創新及創業發展基金委聘聖雅各福群會開展首個食物援助旗艦項目「Food-Co」，今日公佈成效兼舉行嘉許禮。擔任主禮嘉賓嘅署理行政長官張建宗，獲邀品嚐由三款美食，包括過了最佳食用日期嘅紅莓蛋糕、豆渣製曲奇、同埋用街市賣剩嘅甘筍煮成嘅忌廉甘筍湯，佢就揀咗後者，仲大讚「好嘢」兼畀滿分。在旁嘅社創基金主席張仁良就讚佢識揀，「補番隻腳」。

張建宗話，唔好睇啲街市剩菜賣相唔好，「完全可以食得架」。之後佢致辭時仲講笑話，原本諗住辭詞後先一嚐美食，而家食咗先上台，「我企喺度都冇事，證明係健康」。佢話香港每日製造嘅廚餘以千億噸計，「Food-Co」項目可以善用食物，造福基層，直情係食物援助4.0咁話。

除咗食剩菜，張建宗仲「自首」，佢話自己日前喺網誌已事先張揚今日公佈嘅成效，「其實係犯法架」。佢又自爆，政府2009年推行食物援助計劃，即食物銀行，其實係「抄橋」，因為當年參觀過聖雅各福群會嘅食物銀行，就決定「侵犯版權」，照板煮碗由社署推行，仲向聖雅各耍冧咁話，「其實係抄你哋，唔好告發我哋」。

張建宗話，今時今日食物援助已擴展至有熱餐同肉類等，幫到好多基層家庭。但八方就咁諗，如果政府扶貧措施到位，就唔使咁多人攞食物援助，申領人數亦唔會創新高。越多人受惠食物援助，是喜是悲，八方諗唔通。