唔知大家仲記唔記得，上月尾越洋轉播賽事新加坡克蘭芝一哩賽日，潘頓過去客串除咗憑「川河尊駒」勝出重頭戲克蘭芝一哩賽外，同日亦策騎星洲馬「克林」贏埋另一場一級賽新加坡堅尼，威風八面。

喺新加坡堅尼敗於「克林」蹄下有匹叫「好來厲王」嘅當地馬匹，當時由新西蘭名將高力德策騎跑第12，不過經此一役之後，此匹由邱炳安訓練的3歲O'Reilly子嗣，最近落到高力德妹妹高麗雅手上，剛周五（29日）就勝出咗一場1000米膠沙地賽事，可說為哥哥爭番一口氣。

此場總獎金8萬坡幣（約46萬港元）的第三級賽事，高麗雅策「好來厲王」直路如飛殺上，取得其新加坡客串第4場頭馬，對於接手哥哥座騎，第一次替此駒執韁便贏馬，當然感到高興。

年僅24歲的高麗雅於本年5月18日開始在克蘭芝馬場出賽，其牌照有效期至11月9日，換言之會在獅城客串半年。