禮拜二廣州恒大同上海上港合演峰迴路轉嘅經典戰，雖然加時後贏5:1嘅恒大互射12碼後出局，3,500萬人仔（約4,200萬港元）嘅絕地反勝獎金冇咗，但係仲好多花生食呀。

據內媒《新浪體育》講，恒大班主許家印非常滿意球隊嘅熱血，所以賽後打畀球隊講明照拎1,000萬人仔出嚟派。上港教練保亞斯就嬲爆爆話「恒大主宰亞洲足協」，隨時被罰停賽兩至四場。原來上港賽前幾日喺訓練場一直冇熱水用，而且球隊去球場時有成五單輕微車禍，最離奇係同一車牌嘅車一路喺旅途中「護航」，幾經辛苦去到球場，點知客隊更衣室都係壞冷氣，所以上港就咁大怨氣嘞。