涉嫌虧空國民黨黨產約1.4億港元嘅劉家昌，日前同太太甄珍主動返台應訊，劉家昌仲一度被限制出境，不過前日佢就獲台北地檢署批准以約221萬港元保釋金同埋人事擔保，獲准回港，但劉家昌因為證件問題而擾攘多時先至出境，並於前晚11時許抵港，雖然現場有好多記者，不過佢就全程有講有笑，佢仲話：「我要光明正大站在台上，不會令買票的人看不到表演，亦不想觀眾覺得我是罪犯，希望大家將問號除去。」

未夠資格做犯人

劉家昌強調自己冇被起訴、冇通緝、冇立案及冇判刑，而且出庭之後就可以拎番保釋金，所以未夠資格做犯人，至於今次返台係被問話，只係有傳媒將件事誇大。
噚日劉家昌就到港台出席「光輝歲月」記者會，佢話今日10點開庭前就要返到台灣，現時佢嘅心情好好，絕對冇擔心，亦強調3月19至21日喺紅館嘅演唱會唔會受影響，嚟緊佢仲會開始綵排。
不過劉家昌對於有報道話佢返台灣係為演唱會做宣傳，佢就坦言好唔開心。仲越講越激動，強調冇足夠信心係唔會返去，因為絕對唔會將自己生命同演唱會嚟開玩笑。此外，劉家昌透露方逸華喺呢件事上好關心佢，而太太就唔會再陪佢返台，佢重講笑話太太肥血壓高，而且又怕坐飛機。
劉家昌噚日近黃昏由助手陪同出現機場返台，佢表現輕鬆，透露好多事都唔能夠預計，所以佢相信上庭經過法律程序之後，一切都會好快搞掂，佢臨走時仲風騷話到時喺演唱會見㖭，似乎一啲都冇為事件擔心。