網上睇行車特技睇得多，巴士斜住行你又見過未？有讀者話前晚搭巴士經過大欖隧道遇着爆胎，但車長竟無視車身傾斜照行，結果乘客嚇餐飽，等到巴士駛出管道後先轉乘另一班巴士。

巿民楊先生表示，前晚近11時許，喺金鐘搭城巴967路線去天水圍天恩邨，當時佢坐喺上層右後排位置，巴士駛入大欖隧道管道冇耐，就聽到一聲巨響，原來係右後車胎爆咗，巴士斜埋一邊，由於當時全車爆滿，乘客不知所措，驚架巴士會反。

佢話車長未有理會架車狀態，照樣打斜嚟行，亦冇向乘客交代乜事，直至幾分鐘後駛出管道先至停車，再指示乘客落車乘搭另一班巴士，楊先生落車睇返右邊車身，發現右後輪凹晒，而且條胎好似磨得太耐，蝕到幾乎只見車軨不見車胎，認為司機咁樣開車實在太過冒險。城巴發言人就回應表示，根據行車紀錄，車長匯報巴士喺接近大欖管道出口時發現車胎損壞，之後停車同安排乘客轉乘其他車輛繼續行程，唔知大家點睇呢？