煲呔噚日下晝四點由成都飛返香港，喺疫區附近逗留咗三日，冇惹到豬瘟，算佢執身彩。四川政府見佢咁識做，唔敢單方面禁止四川豬進口，於是亦畀面畀到足，自己禁咗資陽同內江兩個疫區嘅豬隻同凍肉運嚟香港，真係互諒互讓。你話如果周一嶽不識時務，當大老細啱啱喺人家地頭做大騷時，禁人隻豬，呢條數你話煲呔點孭？八方相信，周一嶽咁有政治智慧，只要唔好有發瘟豬肉偷運嚟咗香港，或者有港人因此而中招，實有運行。

北京不變應萬變

煲呔確實認真勤力，佢噚日一抵港就同蔡瑩璧及陳羿飛車返辦公室開工，因為時間都相當緊迫，佢十月要出施政報告，肥龍許仕仁九月就要出政改同西九嘅主流方案。
早兩日，已經有消息話北京喺政改問題上想以不變應萬變，既然民主派唔贊成加功能組別，佢哋亦唔可能只加直選議席，因為違反人大釋法嘅框框，聽講班土共同中聯辦計過數，加地方直選議席等於明益民主派，因為只有佢哋喺直選中有多出嘅票數，而民建聯就攞到盡。
至於八百人嘅小圈子，本來煲呔傾向點都加多少，到一千二百或者更多，但係北京就見過鬼怕黑，覺得八百票都已經好唔容易搞，再加好易會失控。
最後肥龍會點取捨，八方未知，不過聽聞煲呔同佢都估到冇嘢畀大家睇，所以預咗嗰啲可加可減嘅民望到時一定會下滑。煲呔有阿爺照住可能頂得一陣，而肥龍就肯定食到正，話唔定會低過詩姐姐；不過有林D9一日，肥龍都未必會排第尾嘅。

民主派死豬一便頸

話就話政改步伐如果唔郁或者郁小小會俾人鬧，但係對曾許二人組嚟講，愈少變動，佢嘅陣營愈有利，因為煲呔肯定想連任又連任，求八百票已經咁低聲下氣咳到唔停，如果要求千幾票咪更淒涼？所以如果中央真係收緊番改革幅度，佢兩兄弟可能會偷偷笑。
有高人就想點醒民主派，叫佢哋唔好死豬一便頸，堅持唔加功能組別，搞到連直選議席到冇得加，咁樣民主黨嘅第二梯隊就冇法上位；至於選舉團，梗係死都要加大，愈多人愈好啦。


爆料熱線：29290000、27860099
報料傳真：26239278
報料電郵：[email protected]