【智取大市】要有地震才有海嘯(晉佳)
美股港股晉佳智取大市
話而家情況差過金融海嘯?港股跌到1倍book上落超過10個交易日,自然反映一定風險。而家有Volcker Rule,禁止銀行自營交易,唔准持有私募基金超過3%,變相銀行最大嘅風險,係來自壞賬,前排話大型對沖基金高槓桿之下爆煲嘅傳聞,於是大家關注銀行有幾多資本去頂。
當然,壞賬本身可以有足夠破壞力,睇睇香港嘅銀行點樣處理?滙豐早喺2月推出按揭「還息不還本」,同埋個人支援貸款最多3萬蚊。還息不還本,至少令失業、無薪假嘅打工仔供樓暫時供少一半,再加埋3萬蚊,攤開幾個月幫你還本,希望可以拖到疫情減退,大家齊齊復工供到樓,潛在壞賬壓力可以延後,去面對呢個非一般情況。
當疫情緩和,各行各業想回復正常嗰刻,先知道乜嘢行業、乜嘢企業、乜嘢職位受到疫情拖累而永久受創?就當3月份喺金融體系出現一個衝擊波,咁另一個衝擊波可能會係疫情消退嘅時候先發生,因為到時邊個行業、企業、個人出現危機,大家就唔會當佢係非經常性情況去彈性處理。
股市炒定疫情消退自然有一定反彈,疫情消退反彈浪肯定未止境,但金融衝擊波,會喺大家覺得雨過天晴時,再度來襲,就等如地震過後有海嘯一樣。到時,睇怕美股至少做隻長短腳。
晉佳
https://www.facebook.com/advanceguy1
-----------------------------
【武漢肺炎】專頁 全民自救 抗疫資訊盡在《蘋果》
-----------------------
屬於香港人的移民攻略
立即登入
【全球樓行】 Dream House零距離