起義可以揚名，亦都可以致富；分手可以令人抑鬱消瘦，亦都可以令人變肥仔。今年6月，鄭家富拒絕起錨，宣佈退出白鴿黨，民望急升之餘，仲走上搵真銀之路。阿富噚日出席婚禮服務網站宣傳活動，好高興咁分享佢同白鴿黨割席之後嘅生活。原來阿富最近頻頻幫新人證婚，生意勁旺，財源係咁嚟。

慶幸未有客跳傘結婚

本身係執業律師嘅鄭家富，早喺兩年幾前已經申請成為婚姻監禮人，仲加入咗周啟邦律師事務所旗下嘅世紀婚姻見証服務公司，有唔少擁躉嘅港隊足球成員陳偉豪都係由阿富證婚嘅。阿富話，證婚服務越來越受歡迎，今年10月10日當天仲破紀錄接咗30幾對新人嘅證婚booking。
噚日舉辦嘅「新婚生活易大賞2010」，阿富上台分享婚姻監禮人工作，大會特別送上玫瑰金色羽毛筆，寓意阿富生意蒸蒸日上，繼續成全更多金童玉女。阿富話，新一代創意澎湃，行禮地方日新月異，佢個人就試過喺學校同酒吧證婚。佢話好彩未有人提出要跳傘同潛水婚禮，呢樣嘢佢都未試過，唔肯定係咪可以應付得來。
鄭家富嘅證婚booking已經去到2012年中，但係佢好謙咁話呢方面收入唔算好肥仔，每次證婚收三千幾到萬幾，只係佔新人使費嘅1%。早前有傳媒話佢退出民主黨係為咗搵真銀，阿富申寃，話若然想搵多啲錢，就更加唔應該退黨，事關繼續留黨從政，知名度會更高，更方便兜生意咁話。

涂謹申獲贈鹿茸補身

同一場合，阿富多年黨友兼立法會同事涂謹申亦有出席。阿涂上年底第二春，不過冇幫襯阿富，搵咗黨主席何俊仁證婚。噚日阿涂分享婚後生活，狂晒幸福。佢話雖然同老婆工作都好忙，但係兩公婆好多時都能夠成功爭取見面機會，例如佢哋有時會一齊出席活動，咁就可以多啲時間相處。大會送上補品鹿茸畀阿涂，祝佢無論工作同家庭都保持最佳狀態。
mailto:[email protected]