著名導演林嶺東前日(29日)於馬鞍山家中離世，終年63歲。而人稱道具全嘅電影道具領班張偉全，早前跟林嶺東合作電影《迷城》，因為戲中使用嘅道具銀紙太過逼真，因而犯上官非。被控管有22.3萬張拍戲用嘅道具銀紙，裁定罪成判監4個月緩刑兩年。最後經香港電影工作者總會協助，上訴高等法院得直，最終獲判無罪。

道具全今日接受《蘋果》電話訪問，對於林嶺東離世表示惋惜，表示從冇怪過對方，令自己惹上官非，佢話：「冇，冇怪過林嶺東。呢樣嘢唔係我、導演或者製片部責任，係真係大家同政府溝通不足。我哋真係唔知，好坦白，申請容乜易。出事後阿東唔喺香港，但都有叫人慰問過我。係呢件事上，林嶺東係有啲尷尬，後期完咗件事之後，不論第一次輸咗之後，我哋做《八部半》，大家坐埋枱都係好開心。」《迷》片之後，道具全跟林嶺東再合作過電影《沖天火》同《八部半》。

林嶺東畀道具全嘅印象係快人快語，佢話：「畀我印象係爽朗、大俠，好快趣嘅人。係好多要求，都會有拗撬，但都係正面嘅。」佢話林嶺東雖然要求多及高，但去到時間或者金錢做唔到嘅時候，林嶺東都會妥協，同轉用另一個方法。

精選娛聞，喺晒《娛果》 http://fb.com/appledailyent