候任特首林鄭月娥公佈以政務官同現屆官員為骨幹嘅新班子，一如佢所講，冇驚喜亦冇驚嚇，AO出身通常四平八穩，相信冇咗上屆梁班子登場後嘅連場「驚魂」。

雖則平凡亦可、平淡亦可，班子唔出岔子，對林鄭嚟講都有好處，但有政界中人開咗盤，話班子內唔少人唔係林鄭首選，唔排除林鄭喺任期中途會換馬。有人就話大熱被換嘅係財金系官員，特別係獲任財庫局局長嘅劉怡翔，皆因佢年紀已經達67歲，做足5年就超七，估緊林鄭等兩三年開局坐穩後，或會換人接任。

另一個熱門當然係財爺陳茂波，皆因佢唔係林鄭心目中嘅大掌櫃，若之後唔聽林鄭枝笛，被換唔係無機會喎，之不過咁，有人估茂波任內都會聽聽話話，始終佢嘅財金底子唔算勁，相信都願意靠林鄭信任嘅任志剛同查史等畀意見，墮馬機會又減低！

就連66歲嘅政務司司長張建宗，都喺政界開盤嘅換馬名單上，眾所週知，其實林鄭想搵個較年輕嘅人做CS，可惜搵唔到啫，如果有人，中途易角亦係easy job。

一開局就講換馬，有啲唔老嚟喎，而且中央制唔制先？呢位花生友笑稱，既然梁振英都開創先河，林鄭跟風有乜咁奇？