當年今日
關於我們

李八方online︱中國衞健委主任與林鄭除罩握手對談 飛沫坦蕩交流冇有怕

蘋果日報 2020/11/06 14:53

林鄭月娥衞健委口罩馬曉偉中國

武漢肺炎爆發以嚟,香港市民一直都要靠自覺同自律嚟守住疫情,點解?因為香港有一班防疫意識令人擔憂嘅高官囉。政府初初舉辦疫情記者會嘅時候,衞生署署長陳漢儀曾經講過,如果無病徵嘅話,市民喺一般社交場合係唔需要戴口罩。估唔到差唔多10個月後嘅今日,出發赴京述職嘅林鄭竟然仲「記得」呢番說話。政府噚晚(5日)發佈咗一張佢同中國衞健委主任馬曉偉嘅合照,相入面嘅佢哋冇戴口罩,笑得好燦爛,隻手仲握得好實添……
其實早喺今年初,全球各地已經有專家呼籲民眾改用elbow shake(撞肘問候)打招呼,取代傳統嘅握手,因為人嘅手肘係冇可能掂到塊面,播毒風險比握手低得多。外國好多名人都有響應,就連港大醫學院都有大力推廣添。不過貴為中國衞生部門之首嘅馬主任同林鄭就一於少理,手照握。
八方起初以為,佢哋兩個只係因為要影合照,所以先短暫「除罩相見」啦,點知喺第二張相,竟然見到佢哋同其他高官開會嗰陣,都仲係咁「坦蕩蕩」,真係嚇咗一跳。明明其他高官都有戴罩,就只有佢同馬主任好似漆黑中嘅螢火蟲一樣咁鮮明出眾,令人一眼就搵到佢兩個。
喺另外嘅相入面,仲見到坐正喺林鄭對面嘅嗰位最高級大陸官員,都會同林鄭一齊「除罩」。美國之前已經有研究發現,大聲講嘢嗰陣,飛沫可以噴到2.4米遠。八方好想問,一個負責領導港府抗疫,一個負責控制大陸疫情,點解佢哋兩個堅持除罩面對面講嘢?唔怕互傳口水、做壞榜樣、教壞細路咩?
之但係又難怪林鄭忍唔住嘅,話晒中國都係全世界最「自由」嘅國家,唔似而家嘅香港,又無得除罩、又要守限聚令,連6人以上同枱食飯都唔得。八方仲為林太唔戴罩諗咗好多原因,可能佢唔想再「一戴一露」個銅芯口罩搞到俾人笑,所以索性唔戴;又或者係再次「跟黨走」,學早前南下廣東嘅習主席一樣,除低個罩見群眾。
但無論咩原因,就算連坐喺林太隔籬嘅陳肇始局長唔提佢都好啦,八方都想溫馨提示吓,其實北京喺6月先爆發過第二波本地感染疫情,令到差唔多幾百人受感染,希望林太可以戴返個罩,畢竟自己感染事小,搞到北京爆發第三波事大呀!
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁