當年今日
關於我們

【培育翻版陳凱琳】大台搵港姐應急冠軍麥明詩極速拍劇

蘋果日報 2015/09/05 06:00

蘋果港姐香港無綫冠軍即時大台拍劇邵珮詩麥明詩

港姐上個星期日就選完喇,今屆最令人印象深刻嘅究竟係隻點推都推唔走嘅老虎呢,定係頒完獎之後一眾佳麗體現友誼萬歲嘅溫馨場面呢?

其實今年港姐算係充滿話題,對比起上年冠軍邵珮詩,好多人都要講一句,「而我不知邵珮詩是誰。」大台見近呢一年啲小生花旦走得七七八八,成日俾人投訴幾線劇集嚟嚟去去都係同一班演員,所以馬上推出一班港姐「應急」,包括陳凱琳、蔡思貝、劉佩玥等等。

今日有周刊報道,指大台急住栽種小花,馬上搵出爐港姐應急,仲已經決定咗港姐三甲下個星期會同戲劇監製曾勵珍見面,務求佢哋盡快加入劇組,成為新一代小花。

其實按照慣例,大台每年都會派港姐參選國際小姐,或者出席各類型活動谷下人氣,同埋要到訓練班磨煉下演技先會俾機會佢哋拍劇,好似去屆港姐冠軍邵珮詩,選完一年,依家讀緊藝訓班。

不過,據周刊爆料所講,「十優狀元」麥明詩連奪最上鏡小姐同港姐冠軍,坊間接受程度都好高,所以大台已經打算跳過一啲行行企企嘅綜藝節目同司儀工作,俾佢試下拍攝,亞軍龐卓欣同季軍郭嘉文亦齊齊upgrade,keep住曝光率之餘亦可以提早「入屋」增觀眾緣,不過要做到2013年港姐冠軍陳凱琳咁又拍劇又出活動幫公司賺到錢,依家仲係言之尚早。