【本報訊】長實（1113）首個限呎樓紅磡利工街悅目，當日賣樓標榜無窗台，上周本報邀請詹濟南（詹Sir）驗收一個430方呎兩房單位，除了廚房水喉位鬆脫、天花油漆差，評分都有86分，比較年內同系新盤，如北角Diva與將軍澳緻藍天，「呢度好好多啦！」另沒有窗台的外面，卻原來是樓下冷氣散熱機。

水龍頭接駁差有漏水

詹Sir驗收一個中層單位，業主去年3月以約670萬元買入，兩房間隔，選用開放式廚房，長形客飯廳算闊落。鋅盆先放水，詹Sir就走去檢驗客廳天花地板安然無恙，不過返轉頭，就見廚櫃滲水到地板。打開廚櫃，來去水喉都貼晒「checked」便條，以為沒事，卻睇漏了水龍頭接駁位未扭好，結果水由駁位漏落來，不斷滴水，令櫃底一灘水。
詹Sir就幫水喉匠伸冤，指水龍頭接駁位置遭鋅盆底隔住，「呢啲設計，玩死水喉佬，點扭得實呀！」他補充，業主收這類潔具，試水時要載滿過水龍頭接駁位，因為接駁位扭少一兩下都會漏水，而且開熱水試，因為讓鋅盆熱漲，過到這關，無事就無事。
樓盤當日標榜無窗台、無露台，現場直擊，沒有窗台的外面，卻原來是樓下單位分體式冷氣機的散熱機。大熱天時，樓下開冷氣，你唔開，去開窗，想像到股熱氣會點焗入屋。另外，詹Sir將房門閂埋，發現門阻漏塊膠，房門好易撞崩。
長實發言人回覆，上述單位業主尚未遞交「樓宇接收核對表格」，即執漏清單，當收到後會派員聯同承建商視察單位，並作出合理及適當跟進。