【新增回應】

恭喜！恭喜！《超級巨聲》出身嘅周志康，今日喺Instagram貼圖，宣佈細女今晚平安出生。

剛出生嘅周家二公主，擘大口仔，相當得意。呢頭爹哋貼完相，嗰頭已經收到唔少aunties嘅祝賀，包括蔡思貝同岑杏賢等，都有喺周志康個post度留言講恭喜。

其實周志康與太太Emily之間已育有一女Emma，現年3歲，早前Emily仲喺自己嘅IG度post大肚相，見到Emma錫錫媽咪個肚，爹哋周志康又錫個女，一家人好溫馨。

周志康今日接受傳媒訪問時透露：「本來預產期喺19號，但係我太太今朝有少少作動，我哋咪去睇醫生，醫生話可以準備喺今日生，所以我哋咪入院催生。」佢仲話以為第二次冇咁緊張，點知太太一開始作動，自己就心跳加速，結果BB好順利喺今晚出世，佢仲有親手剪臍帶，佢話：「穿羊水到出世都係一個鐘左右，醫生入嚟幾分鐘就出世，BB真係抵錫。」

周志康雖然未知細女出世幾多磅，但佢話囡囡個樣好似媽咪，連耳仔都一樣。咁唔知見到囡囡又有冇喊呢？周志康話：「一開始都冇喊，最初係安撫太太嘅情緒，因為佢好痛，咁BB出咗世，開始覺得好感動，但係有一個位有少少擔心，因為BB出咗嚟只係喊咗一聲就冇喊，仲見到醫生同護士都圍住個BB，可能因為太太其間打咗止痛針，啲針去咗BB度，當醫生同佢打完支針，即刻聽到BB喊聲，之後我個心軟一軟，忍唔住喊。」

問到大女探咗妹妹？周志康表示：「家姐已經探咗BB，佢話會好錫BB，畀晒啲玩具BB玩；之前我都代妹妹買咗份小禮物送畀家姐當係見面禮，希望佢哋和睦相處。」

精選娛聞，喺晒《娛果》
http://fb.com/appledailyent