花旗兩大政黨落實救市方案，股市造好，昨日港股亦扭轉前日跌勢，掉頭挾淡，力度相當大，因為下禮拜期指結算，好友唔把握機會收復失地，如果花旗股市掉頭插，好友會輸得好慘。
恒指升成1600點收市，重上25000關樓上，指數嘅升幅好有氣勢，但成交配合唔到，只有1266億成交，同前日比較，少咗一成有多，情況好易明，經過呢幾日過山車市況，股民驚魂未定，昨日恒指高開過千點，邊度夠膽追貨，最多都係觀望，成手蟹貨嘅就趁機減磅，從成交睇，昨日係期指結算好淡角力嘅市況，個市只係喺反彈階段。

技術上港股下個阻力位喺20日線，即25927，如果昨晚花旗股市繼續升，下禮拜一可以試20日線，不過，要再上就有啲難度，因為禮拜三期指結算，淡友唔會咁易畀好友攻破呢個關。相反，如果花旗股市插落，下禮拜一淡友就唔會留手嘞。花旗嗰邊仲唔係好妥，不過聯儲局下禮拜多數會再減息，所以港股暫時有條件守喺250日線樓上。
交行C輪7612：交行（3328）昨收9.89元，反彈一成有多，企喺20日線收市，技術指標靚咗好多，如果成交多番啲，有機會試吓11元阻力，可以諗吓交行C輪7612。隻輪昨收14.8仙，槓桿率6.7倍（有效3.9倍），對冲值0.58，正股升上11元，7612會見22仙，升幅接近五成，短炒算吸引，正股跌穿9.30元止蝕。