的士黃：Hi，成議員，着晒成套西裝，又去開會啊？
成議員：唔係，趕住去個新春酒會，真係成個月都無停，連開個電子郵件嘅時間都無啊！
的士黃：唏，做議員就係食得鹹魚抵得渴啦，不過第日你會搭我車就唔使愁無得上網啦！
成議員：唔係啩，搭的士都有得上網，咁你都幾畀本去噃，但係無乜客會知你有咁先進嘅科技喎！
的士黃：唔係咩高科技啦成議員，呢個世界有競爭就有進步啦，政府唔好管咁多，畀我哋自由啲，就自然有人諗到新方法去突圍。就算係開的士，政府連收幾錢都管到死一死，咪一樣有行家組織打折車隊，咪就係有競爭嘅後果囉，最尾咪你哋啲消費者得益。
成議員：係，係，但係打折的士同上網無關係嘛？唔通你哋搞埋上網預約打折的士？係就記得畀個網址我，等我約你都方便啲啦！
的士黃：咁又未係住，不過都快㗎啦，你睇我哋行家𠵱家架的士裏邊成套IT裝備，手提電話都不知幾多部，仲要越方便越新款就越多行家用，乜嘢PDA手機，我哋用到熟一熟啦！呢啲咪叫的士司機自我增值囉，無人教㗎，更唔使講叫政府資助我哋，要搵食就自然識搵新方法，有行家諗到咁做，唔到你唔學，唔覺唔覺我都成個IT人咁。睇怕遲啲實連全球衞星定位都有埋，咁打折的士喺邊個位都一清二楚，你哋叫車就快到你唔信啦！
成議員：你一輪嘴講，都無答我第日搭的士點上網？