鑽石董（DiamondTung）啲脾氣果然好似鑽石咁硬，面對經濟財赤困局，堅持三不，不徵銷售稅、不大幅裁減公務員、不開設賭場。
本來擇善固執，我哋唔會多出聲，但講到賭波，佢話唔鍾意「賭波合法化」呢個詞，只會堵塞、「箍住」賭波，咁就判咗「賭波合法化」死刑，李鵬飛、黃毓民等人贊成賭波合法化，以後要收聲嘞。
左丁山鍾意睇波，但唔賭波，亦唔反對、阻止別人賭波。事實上，喺互聯網賭波嘅，不知凡幾，都唔知林煥光、曾蔭培點樣可能秉承大老細鑽石董嘅意旨，去堵塞、箍住賭波。佢哋如有本事，一早做咗啦，點使發表賭博條例諮詢文件？呢份文件都重未搞妥，民政事務局正在整理民意，鑽石董就已經講到咁明白嘅立場，你都知林煥光佢哋點樣去「按摩」最後報告書啦。
聽講阿松在官場推介克林頓謀士DickMorris嘅「新君王論」（TheNewPrince），呢位摩利士先生最叻揣摩民意，製造言論，連克林頓雪茄事件，佢都可以利用民意箍住國會議員，令佢哋畏首畏尾，唔敢判克林頓有罪，你話幾犀利呢。
唔該阿松哥出多啲牙力，請董老闆睇真呢本書，唔好令啲手下（如林煥光）難打圓場啦。克林頓在位八年，醒就醒在從不「擇善固執」，只順從摩利士嘅民意調查；董老細淨係識睇唔識做嘅話，松哥推銷呢本書都冇乜意思。