特首林鄭月娥在首份施政報告提出向大學增撥研發資源、提供助學金，也力推中小學「科學、科技、工程和數學」（STEM）教育，揚言長遠要「創科」成為一種新發展模式；黎冠峰則認為，政府如想加強科研，除了資源要到位，亦要改變教育制度、產業模式，解決房屋等民生問題，為市民營造可以「冒險」的空間，「只有你對生活有安全感，你先敢試新嘢，否則你唯一可以諗嘅就只剩得下一餐飯邊度嚟」。

對於政府大力發展科研，黎表示歡迎，惟長遠要改變產業模式，「香港（創科）依家多數都係做服務，例如金融業，無乜自己產生嘅軟件、硬件」，理學畢業生因此缺乏就業機會，往後的學生見出路少，更不願選讀相關學科或投身科研，形成惡性循環，「所以唔係話你加多啲物理學位就可以解決，多咗人但無出路，幾年後亦會少返學生」。政府須鼓勵初創企業（startup），長遠才能培育創科人才。

黎冠峰續指，香港生活壓力大，令大部分人不敢「冒險」，也是窒礙創科發展的癥結，「好似地產，都係綁住人令人唔敢試新嘢，因為大家太驚無咗份工……因為只有對生活有安全感，人先敢試新嘢，否則你唯一可以諗嘅只剩得下餐飯邊度嚟，你無呢種安全感，你唔會肯 take risk（冒險）」。

他又促政府鬆綁學制，「好似（升讀）物理系，唔需要剩係睇DSE（中學文憑試），以免令到本身物理好、中英普通嘅同學升唔到……變到啲中學唯一教嘅就係點考試」，越專注操練考試，就越難培養創意與科學精神。

記者 葉偉東