香港嘅反吸煙運動，可能係亞洲最嚴厲嘅，立法會今年之內，會通過全面禁煙條例，所有食肆娛樂場所街頭店舖內，全部不准吸煙。飲食娛樂界極力反對，不過大勢所趨，無力反抗，民主派第一個支持政府，民建聯搖搖擺擺，最後又會支持政府，周一嶽局長唔使拉票，已穩坐釣魚船，張宇人議員代表選民大力反對，不過獨力難支，邊度會有計。

政府都算醒目，去年與議員考察外地禁煙方法，走咗去老遠嘅愛爾蘭，唔去就近嘅日本。如果去日本考察，就唔會禁煙禁得咁徹底啦。建築邦之親戚Ｂ去日本旅行，首先入住東京一酒店，行前已要求旅行社預訂不吸煙房間，點知去到酒店，接待員話：「閣下嘅旅行社係有要求（request），但我哋無法應命，對唔住，請住在吸煙房間先。」親戚Ｂ幾大都唔肯，但冇法子講得掂，講講吓，對方好似聽唔明英文，佢又唔識日文，點談判呀。親戚Ｂ死死氣上到酒店二十一樓，入房前特登巡咗一輪，發覺只有兩間𨋢口隔籬嘅房間貼上「不吸煙房間」，換言之，吸煙房間佔極大多數，「不吸煙房間」梗係唔夠分啦。日本酒店好多日本人，日本國內遊客，無論男女老幼，都唔介意住吸煙房間，親戚Ｂ在酒店餐廳內，見到一對夫婦一齊煲煙，兩個年幼子女吸晒二手煙，人人視作等閒，親戚Ｂ唔鍾意聞煙味，惟有自行鬆人。
香港反吸煙條例一旦實施，唔該啲酒店、酒樓夥計首先昅實大陸自由行旅客與日本遊客，不可厚此薄彼，否則傷害民族感情！日本人不分男女點解咁鍾意食煙，或有歷史原因，左丁山唔識，但知道全世界人民之平均壽命，以日本人最長，此統計數字好似與日本人吸煙習慣有矛盾，唔知有冇人識得解答。