當年今日
關於我們

森巴嘉年華:A貨細哨踩場
美斯笑晒巨鵰

蘋果日報 2014/06/13 00:00


「細哨」去咗阿根廷陣營探班?咪儍啦,呢個「細哨」唔係真嗰個巴西中場朗拿甸奴,只係A貨嚟,係由球迷扮㗎咋。雖則佢好快就俾在場保安夾走,但成功埋到美斯身,仲同對方有講有笑㖭。話時話,美斯份人真係好隨便,乜都無所謂,否則都唔會公然喺練習場整條波褲,露底晒巨鵰啦!
empty
A貨細哨(右二)俾保安夾走前,同阿根廷前鋒美斯(右三)有講有笑。美聯社
球迷亂闖阿根廷軍營
下個禮拜日會喺F組分組賽對波斯尼亞嘅阿根廷,禮拜三進行咗課夜練,但有神秘嘉賓嚟踩場。美斯同隊友練練吓波嘅時候,有十幾個球迷衝入場,其中一個紅色底白橫間Tee嘅男粉絲仲走到美斯面前,跪低幫佢擦波砵;而美斯亦好玩得,用右手摸番個粉絲個頭,之後仲同佢嚟個深情擁抱,兼且除咗件練習衫送埋畀佢㖭。
除咗呢個紅Tee粉絲,有一個打扮成細哨咁樣嘅男粉絲亦成功埋到美斯身,雖則冇得同美斯抱抱,同埋攞到紀念品,不過就同美斯有講有笑,美斯亦表現得好開心。之後呢個A貨細哨俾現場保安帶走,但都係笑住咁走,咁梗係啦,可以同美斯呢啲世界級球星近距離接觸兼傾埋偈,仲唔開心過中頭獎咩。
講開美斯,禮拜三日頭呢位巴塞隆拿球星隨阿根廷進行閉門練習時,唔知佢條褲有乜事,搞到佢要除低再着過,但咁就出事啦,俾埋伏喺附近嘅記者影到佢露三角底底兼晒巨鵰。估唔到佢人仔細細,原來咁好「本錢」,唔怪得之前拍過底褲廣告。唔知當時企喺佢身邊嘅教練沙比拿同隊友加雷,會唔會羨慕又妒忌呢?
empty
阿根廷周三晚進行公開練習,有女粉絲(中)喺看台上幫班球員吶喊助威。
美聯社
基斯普:奪冠即飛走
另外,今屆世盃喺巴西舉行,話晒阿根廷同巴西都係身處南美洲,可以話有半個主場之利。但阿根廷名宿基斯普就提醒班國腳,如果佢哋真係喺巴西贏咗世界盃,就要嗱嗱臨鬆人。佢話:「若然阿根廷喺巴西贏到世界盃,我建議佢哋最好立即坐直升機走人,否則隨時連命仔都保唔住,分分鐘俾巴西球迷殺死。」巴西同阿根廷係世仇,如果阿根廷真係喺巴西地頭捧盃,真係暴動都有份。
識睇 一定睇蘋果嘅足動世盃:
http://worldcup2014.appledaily.com/