由王貽興同劉翁自編自導自演嘅ViuTV新劇《VR驅魔人》明晚推出，製作團隊邀請咗詹瑞文、葛民輝、錢小豪、劉浩龍、吳浩康、吳耀漢、樓南光等相助，其中一個單元就搵咗江若琳(Elanne)演出，日前佢仲幫手拍攝宣傳花絮。

王貽興同劉翁為搞氣氛，諗住喺鏡頭前打破江若琳happy girl嘅形象，等觀眾可以睇到Elanne嬲豬個樣。劉翁話Elanne只係執三攤，仲讚原本嘅女主角身材火辣，瞬間將Elanne比下去，Elanne就露出尷尬笑容，仲大爆：「我覺得你哋好冇誠意囉，仲要喺鏡頭面前咁講！」即使劉翁伸出友誼之手，Elanne都不為所動，仲突然起身拒絕受訪。

正當貽興與劉翁以為成功激嬲江若琳之際，轉身離座嘅Elanne竟然即時爆喊，嚇得兩男不知所措，自知「玩大咗」嘅劉翁更示意Cut機唔好再拍，一臉憂心，Elanne由工作人員陪同到洗手間冷靜一下，現場氣氛一片死寂。

但原來真正被玩嘅王貽興同劉翁，當Elanne再次埋位時，劉翁同貽興已變得拘謹尷尬，最後Elanne一句：「低能仔！玩你哋咋！」兩位主持先知被玩，原本臉容崩緊嘅劉翁仲除低眼鏡抹汗拭眼話﹕「我嚇到標屎啊！」

精選娛聞，喺晒《娛果》 http://fb.com/appledailyent