仲記得亞洲金融風暴期間，金管局動用過千億入市殺鱷，令隔夜拆息一度扯高至300厘，結果喺立法會議事堂，當年殺鱷三人組嘅金管局總裁任志剛，俾潮州怒漢詹培忠，譏諷為「食砒霜毒老虎」（即係殺鱷之餘自己都瓜埋），金勞詹衝擊任總嘅名句，亦成為千古傳頌佳話。
不過時移世易，近年任總好似XO咁，越老越醇，對住啲立法會議員唔該前唔該後，噚日開會遲到嘅詹議員，想喺次按問題度挑戰任總，但最後俾熟悉次按嘅任志剛還以顏色，連主持立法會財經事務委員會會議嘅陳鑑林，都搭多嘴踩一腳。
一向意見特立獨行嘅金勞詹，話美國政府從來唔見宣佈過，當地主按（即首按）同次按嘅數字有幾大，佢又話美國首按通常做七成，就算當二按（即佢口中嘅次按）係兩成，咁除非美國房地產跌多過兩成，先至好大鑊，但咁耐佢都未聽過當地房地產實際跌幾多成。

金勞詹唔識次按定義

話鋒一轉，詹議員仲曉以大義，話次按係花旗國同啲老外做市者，利用負面消息「合法呃人」嘅伎倆，金管局代表政府，唔應該人講佢又跟住講。
四両撥千斤嘅任志剛，陰陰嘴咁笑住話對「詹叔」問啲咁嘅問題，「有啲失望」。事關次按唔等於二按，而係借貸人還款能力較差嘅按揭，先叫次按。老實講，呢個定義連華華都知。
任總又話，就算講首按同二按，據佢了解，美國係做足十成或者最少九成按揭，唔係好似香港咁七成上限。
成日撰文寫次按嘅任志剛，取笑詹議員嘅問題，反映詹叔冇睇佢嘅次按大作，仲叫詹叔不如上網睇清楚先再講。
基本定義都搞錯就鏟人嘅詹叔，當然冇議員幫拖，不過，勢估唔到陳鑑林會加把口話，唔好叫金勞詹上網啦，索性任總印叠文章俾佢睇把啦。

電郵：mailto:[email protected]