當年今日
關於我們

隔牆有耳︰科大聖誕派對浪費食物 - 李八方

蘋果日報 2009/12/22 00:00


有食唔食,罪大惡極,科大新校長陳繁昌上星期四第一次參加校內聖誕聯歡派對,被發現食剩一大碟食物,真係冇衣食。
香港人去食自助餐最怕執輸,食少隻生蠔都驚回唔到本蝕咗,目擊惡行嘅陳先生睇唔過眼,影低罪證向八方報料。佢指陳繁昌面前有一大碟食物,但幾乎冇郁過就成為廚餘,從陳先生提供相片可見,校長同枱其他高層胃口麻麻,食剩唔少嘢。
校長太忙冇時間食
早前科大有宿生被揭發以香蕉、零食玩不文遊戲,唔珍惜食物,報料人認為「大學生無視社會責任,師長難辭其咎。」科大校方解釋,當日雖然係自助餐,不過校長及高層有專人幫忙攞食物,並非校長貪多攞埋食唔晒;而當日陳校長要抽獎頒獎,又要同教職員傾偈、合照,根本冇乜時間食嘢,發言人承認食剩嘢唔係太好,會研究改善。環保團體綠領行動總幹事何漢威話,好多人眼闊肚窄,開派對食剩好多嘢,唔想浪費應該準確計算份量,或提醒出席者帶定餐盒打包剩菜。