新一季歐聯有排都未到戲肉，第一圈外圍賽都要下周二先開打，但一場潛在「教派衝突」即將爆發？話說北愛爾蘭嘅連菲特喺第一圈外圍賽對住聖馬力諾嘅La Fiorita被視為勝望甚濃，一旦如外界所料晉級，次圈就會硬撼蘇超班霸些路迪。不過，由於連菲特嘅新教徒支持者眾，些路迪球迷則有愛爾蘭裔天主教徒背景，矛盾比蘇超格拉斯哥流浪對些路迪「Old Firm」打吡有過之而無不及，原定7月12日喺連菲特主場上演嘅首回合，仲要撞正當地慶祝1690年Battle of the Boyne勝利、被視為新教徒擊退天主教勢力嘅一場重大戰役，喺格拉斯哥同貝爾法斯特往往引發兩派教徒衝突，令當地保安部門大感頭痛。

好彩兩軍喺場外都有偈傾，繼歐洲足協許可一旦連菲特晉級，呢場首回合將會延期至當地時間7月14日周五下晝5點開波，些路迪周五亦宣佈，經過同北愛爾蘭警方商討後，決定以球迷安全為理由不設任何作客球迷門票，意味球員需要喺0球迷支持下作客征戰，次回合就會如期喺19日（周三）喺些路迪公園舉行。