姑勿論你係咪杯葛咗CCTVB，或者係咪罷睇咗反智劇集，但近日《衝上雲霄2》的確係城中熱話，facebook或者茶餘飯後總會討論吓《衝2》，喺航空公司任職機師嘅公民黨譚文豪就開咗個「衝上雲霄 專業版」Fan Page，道盡每集《衝2》嘅錯處，Fan Page短短四日，足足超過5,300個Like，呃Like能力仲勁過佢所屬嘅公民黨（4,841個Like)。
譚文豪本來喺自己個facebook寫劇評，點評吓《衝2》有乜嘢錯處，點知陸續有人向佢請教，有人建議佢試吓開個Fan Page，每集做完總結嗰集嘅錯處，結果反應極之熱烈。本來個Page得百幾個Like，但佢返工揸一程飛機返香港，個Page就勁升到有幾千個Like！
譚文豪話，唔係想踩低TVB抬高自己，但係睇到有基本錯誤，唔講唔安樂。例如現實中嘅副機師，個個都係極富經驗，唔似劇中年輕男演員咁騰雞，又例如Pilot Flying嘅吳卓羲明明揸緊飛機，現實中係唔使同控制塔講嘢㗎，而係由Pilot Non Flying負責。