萬眾期待的農業銀行（1288）IPO今日正式登場！為咗迎接呢隻巨無霸，傳媒、股票行、散戶都唔敢鬆懈，但至緊張嘅就梗係農行自己上上下下喇！
噚日人哋創生控股（325）掛牌之喜，農行就派出1名主任做膽，拖6名高層落港交所踩場。Sorry，正確學名係「取經」先啱，以保7月16日自己掛牌之時平平安安。

下晝忙開視像會議

咁逗留短短15分鐘，幾位睇咗啲乜呢？首先係圍住工行（1398）當年有特首撐場張威水掛牌相，但見主任手指指，可能係研究高層排位，又可能係估特首呢次嚟唔嚟「抽水」，又或者係訓示啲同事一定要超越工行！之後就殺去觀景台，睇睇交易大堂實景。幾位微服出巡，但都俾大家發現，皆因全程有港交所高層傍實，所以好難唔俾人認出。
而呢邊廂中高層人員喺交易所視察場地，另一邊廂極高層嘅行長張雲同幾位副行長亦忙到不可開交。噚日下晝仲要喺香港、紐約、倫敦3地同步舉行視像會議，同傳媒講解呢次世紀集資嘅詳情。至大粒嘅張雲由副行長朱洪波傍住坐鎮香港，身在倫敦同紐約做緊路演嘅董事長項俊波、副行長楊琨、同埋「白頭潘」潘功勝都好忙，認真大陣仗！

李華華
mailto:[email protected]