當年今日
關於我們

【片主縮沙】獲邀返大陸擔正拍《如來神掌》 傳鈕承澤因涉性侵被飛

蘋果日報 2018/12/25 15:47

如來神掌豆導鈕承澤王台慶王大陸

曾執導電影《艋舺》嘅台灣著名導演鈕承澤(豆導),喺本月5日被揭疑對其執導嘅電影《跑馬》期間,涉性侵女工作人員(新聞連結: https://bit.ly/2SvjJqR ),其後佢到警局助查時,強調雙方係「朝交往方向進行中的男女朋友」,強烈否認自己性侵。最後被檢方諭令150萬元新台幣(約38.1萬港元)交保,但佢始終都冇道歉,加上佢抱怨外界「未審先判」,令唔少網民大感不滿。
今日有台灣傳媒報道,原來豆導喺爆出涉性侵事件前,獲大陸片商睇中,邀請佢參與網路大製作片《如來神掌》,仲會擔正做男一,不過o依家對方「縮沙」,豆導不單冇得擔正,分分鐘連喺大陸嘅事業都會泡湯!
據報道指,喺早前金馬獎發生台獨風波後,大陸已限制每部電影最多只可有兩名台灣籍嘅演員參與,劇組因此唔可以偏向選用台灣藝人,但《如來神掌》嘅老闆後來透過關係,搵咗豆導到北京試鏡,畀佢擔正演男一,嗰個角色係約50歲左右、為人忠厚、性格沉穩內斂,實則詭計多端、善於利用人性弱點、可謂成件事嘅幕後操縱者、背後嘅big boss,亦係黑羽會嘅神算門下老者。
點知豆導被控性侵,中間人對台灣傳媒透露,片商馬上打消念頭,有指本來金馬台獨事件仲觀察中,後來老闆仲考慮延後選角,又將近考慮了10天,最終決定都係唔敢用,因為怕批審唔過。今次好可能係豆導喺2014年拍《軍中樂園》喺大陸上映失敗後,再度被「禁」。
另外,報道亦有指豆導一直想搵憑《我的少女時代》喺大陸爆紅嘅王大陸合作,由於兩人喺大陸都好吃香,一合作必定收個滿堂紅,而王大陸亦好欣賞豆導,執意要合作,有傳豆導喺2015年,準備咗至少一億人民幣(約1.13億港元)上門求合作《青禾男高》。不過,事件卻因王大陸父親王台慶對豆導印象不佳而反對,王氏父子一度因此影響關係。雖然王父反對,但未影響王大陸與豆導之間嘅交流,不過,喺豆導出事後,王台慶接到傳媒查詢王大陸係咪同豆導有合作時,王台慶回應「沒這回事」,直接落閘割蓆切斷關係。
報道亦接獲喺大陸發展嘅台灣劇組傳嚟嘅消息,指大陸嘅高層已私下對台灣劇組透露:「你們那個豆導這次涉入性侵,完了啦!」甚至還認為,豆導喺大陸嘅工作和作品,恐怕都不保。但係由於豆導手機一直未有接通,而佢公司嘅電話亦冇人聽,故媒體未能求證相關消息。
精選娛聞,喺晒《娛果》
http://fb.com/appledailyent