【姊妹催婚】與百億闊少感情穩定 蔡卓妍﹕順其自然
蔡卓妍黃又南徐天佑再見UFO
蔡卓妍(阿Sa)、徐天佑、黃又南同衛詩雅等今日喺尖沙嘴太空館電影《再見UFO》出席開鏡。日前先喺美國洛杉磯出席完鍾欣潼(阿嬌)嘅Per Wedding派對後就即刻返嚟開工,佢話:「已經十幾年冇嚟太空館,細個好鍾意嚟呢度個劇場。」
講到今次套戲以UFO為題,佢話:「真實冇見過,但成日聽夏韶聲講覺得好好聽,我亦相信真係有UFO存在,好想見吓。」阿Sa又話自己好沉迷歷史同古蹟:「我好鍾意睇金字塔、羅馬鬥獸場同秘魯馬丘比丘,我以前同阿嬌都成日話想一齊去百慕達。」
但阿嬌o依家要陪老公,應該唔得閒理你,阿Sa話:「唔會,佢唔係咁嘅人。」而阿Sa與「麻雀大王」後人兼百億闊少石恆聰(Anthony)感情穩定,係咪結婚渡蜜月時一齊去?佢話:「到時再算啦!」講番阿嬌喺派對上親手將花球交俾阿Sa,係咪想妳快啲嫁?阿Sa話只係意頭,當時完全冇諗過去搶:「當時場景好奇怪,容祖兒一路喺後面夾住我,鄭希怡就喺遠處望實,兩個好似夾定咁,不過過程係好感動。」
睇嚟姊妹們都看好係下一個嫁?阿Sa話:「唔好咁講,順其自然啦。」因為要出席阿嬌嘅派對而錯過咗男友嘅正日生日,阿Sa話會食飯補祝,而且仲一早送咗禮物俾男友。
至於天佑同又南稱今次係繼《這個夏天有異性》後,相隔16年再次同阿Sa喺電影上合作,其中天佑喺戲中就同衛詩雅飾演一對,而且仲有激情戲,天佑話:「原本冇㗎,因為套戲係講80年代情懷,以為會純真啲,但導演後來同我講需要加一場激情戲。」衛詩雅話劇本對呢場戲嘅描述唔多:「以我嘅經驗,咁樣講即係想像空間好大,劇本文字描述得愈少就愈激。」
天佑續說:「導演仲問我有冇得操吓肌肉,講到好似隨時要除衫咁。」反而又南就要為劇中角色減磅,佢直言會盡減:「為減磅已經兩日冇食嘢,淨飲齋啡,依家有出冇入,有啲胃痛添。」
精選娛聞,喺晒《娛果》
http://fb.com/appledailyent