韓國SBS電視台新劇《當你沉睡時》將於今日首播，同河智苑、姜敏赫主演嘅《醫療船》，以及金在中、UIE主演嘅《Manhole》打對台，劇組亦不容有失，Keep住公開一眾主演秀智、李鍾碩、丁海寅、李相燁、高聖熙等人嘅劇照及預告，更於日前播出特別版，畀劇迷先睹為快。

而《當你沉睡時》係秀智繼去年《任意依戀》嘅新作，秀智都相當緊張新劇收視，今日喺Instagram上載與李鍾碩、李相燁等人嘅合照，提醒粉絲今晚係新劇首播，叫粉絲記得睇，相中秀智BB更賣萌嘟嘴，好不可愛。

另外，秀智今次為新劇剪去長髮，不過原來唔係髮型師操刀，更係秀智BB親自剪，劇集更會播出呢一幕，似乎交代秀智係受到刺激先剪去長髮。