美國每次搞親國會大選，總統同班閣員一定幫佢哋政黨候選人拉票，老董學人搞問責制，連呢樣都抄埋，根據選舉指引，三司十一局可以喺今次區議會選舉入面幫候選人拉票，所以好似民建聯創會成員梁愛詩、又或者已經退出自由黨嘅唐英年，要幫民建聯、自由黨拉票，可以話完全冇問題。
不過就算三司十一局肯送上門，曾主席同田少都啃唔落，先唔好講日日有人叫佢辭職都賴死唔走嘅楊永強「趕客」，其餘嗰班官，馬時亨搞到仙股大跌、孫公填海單官司又未完；搵王永平助選即係叫十幾萬公務員咪投自己一票？詩姐同破壞法治劃上等號，至於林瑞麟，怕且香港冇乜人知佢係主要官員，只係記得陳偉業鬧佢係「林公公」。
數嚟數去，八方認為曾主席同田少揀得落手，只係剩番冇乜嘢做嘅煲呔曾、田少「老死」唐公子同埋廖秀冬三件。不過林瑞麟話，局長可唔可以助選，重要傾個統一立場先喎。



傳真︰2623-9278
電郵︰[email protected]