上星期「含恨」宣佈辭職、結束32年公務員生涯嘅羅范椒芬（圖），唔接受香港傳媒專訪，對內地傳媒就另一個樣，6月中接受黨報《廣州日報》專訪，訪問噚日出街。羅范喺報道中一貫硬頸、強悍作風，話自己性格直爽，但唔係無理，對年輕人仲好溫柔㖭。講到過去10年反教改、倒羅潮、教院風波，佢聲言自己無愧於心，仲話好多市民寫信撐佢，家人又百二分支持佢，成為佢人生最大嘅財富。
經歷咁多風風雨雨，羅太終於覺悟，話自己性格唔適合做官，因為佢唔易妥協。記者問佢未來10年有乜大計，當時佢未正式辭職，話退休後想去教書，𠵱家提早退休，可以早啲圓此心願。教育界歡唔歡迎佢入行就唔知嘞。