【八方相當年】陳劍青為咗自主 百萬年薪筍工都唔撈
陳劍青本土研究社八方相當年
「乜又係你呀?陳生!」電影《家有囍事》吳君如呢句經典對白,近年可以套喺成立本土研究社嘅陳劍青身上,依家講親土地,唔少得佢,本研發表嘅研究,唔止上A1頭條,就連土地供應專責小組都視為重點關注對象,會派人出席佢哋搞嘅研討會,但估唔到同過前特首梁振英、上水鄉委會主席侯志強同場辯論嘅劍青,中學時有讀寫障礙,「係連中文一個完整嘅pharse(詞組)都讀唔到,要逐個逐個字講」,要拆穿政府同既得利益者嘅語言偽術,呢副鐵齒銅牙最終係以時日練返嚟嘅喎。
醉心城市規劃嘅劍青係香港浸會大學地理學碩士研究生及批判地理學會成員,佢同好多香港人一樣,覺得香港地少人多,是常識吧!佢話可能同細個係公屋大有關,「喺好高嘅公屋裡面,係冇地嘅概念」。03年讀大學時搬出嚟住,住過幾次唐樓,兩次搬都係因為收樓,幾年間租金升咗一倍,但又愈住愈細,佢當然會諗,生活空間喺香港地真係好奢侈,點解會係咁?
大學可以話係劍青人生轉捩點,「成日都諗問題,城市為乜而興建?為咗投資定係市民所需呢?」慢慢轉型至城市規劃研究,開辦本土研究社其中一個口號係「香港地,小人多」,就係話畀大家知,香港冇地唔係因為地少,而係因為好多既得利益者壟斷下嘅結果,本研一直狙擊官商鄉黑,上至富人避稅,下至棕土、丁屋無所不研,時時深入虎穴做考察,劍青笑笑口話暫時未遇到啲咩危險,但一直幫班同事買足保險。
將一啲貌似離地嘅議題變成公眾關心嘅事並唔簡單,劍青話本研工作係要帶起市民對土地嘅自主意識,「政府想用、想點用塊地應該要問過我(市民)」。本研做得有聲有色,連政府、發展商都想招攬,試過有學者轉介劍青入中策組,但佢竟然CV都冇交、有財團offer年薪近百萬嘅顧問工作佢都唔做,「走入體制改變體制只係假象,被同化嘅(機會)更多」,就算發展商畀錢做研究佢都唔要,因為「研究自主係最重要」。
土地大辯論進入尾聲,劍青睇死政府以搵共識為名,硬推填海同公私合營,但佢話大辯論係唔會完結,而係另一場辯論嘅開始,本研嘅工作就係儲定彈藥,「政府覺得有壓力,或者某件事爆煲,件事就會推得多啲」。香港地,小人多,好人也多。
成立本土研究社嘅陳劍青醉心城市規劃,想話畀大家知,香港冇地唔係因為地少,而係因為好多既得利益者壟斷下嘅結果。
細細個就鐘意執石頭返屋企,難怪劍青中學就對地質好有興趣,大學揀咗讀地理。
陳劍青大學時到內地考察長江三峽,當官方安排居民發言時,佢就自行搵真‧居民聽真心話,強調冇被洗腦。陳劍青提供相片
參與過灣仔利東街重建及反高鐵運動策劃工作,令陳劍青覺得研究要用返喺社會先至有用。
香港核心問題同土地有關,陳劍青鑽研城市規劃嘅路上遇過唔少猛人,好似前特首梁振英同上水鄉委會侯志強。
本土研究社明年迎來第一個十年,由一開始向朋友揼心口科水,到組織化透過小額月捐營運,一切得來不易。