先講講文化大革命四十周年呢件事。文革一定要講，香港好多傳媒都講緊，咁係好事。我諗香港係全世界近呢一個禮拜講文革講得最多嘅地方。好多人異口同聲都希望中國人要好好反省呢場浩劫。
但係大陸唔准講。原因大家都明，不過我試吓解多一個碼。
因為就嚟就係六四。將來文革同六四必定會相提並論，可以講六四一日唔平反，文革一日冇得反省。所以北京呢排最驚就係有兩組數字連埋嚟講，就係五一六加六四，即係51664。如果早啲反省文革，歷史上可能就未必有六四；可以話你唔肯面對歷史，六四就會重演。
講完文革，講番文字。
最近文化界已經流傳一個網上簽名運動，就係去信聯合國反對用簡體字作為官方中文。我有簽名。
香港通常都係講繁體字，不過台灣文字學者認為，標準中文字應該叫做「正體字」，繁體字係中國大陸對標準中文字嘅「污名化」，所以大陸倡導、通行嘅文字應該稱做「簡化字」而唔係「簡體字」。據佢哋（蔡信發教授等）講，簡化字係「掛羊頭、賣狗肉」，好多創造出嚟嘅字，例如「葉」被簡化為「叶」，根本唔符合六書造字原則。

大陸學者私下認同正體字

事實係，全球已經掀起一股中文學習熱潮，大陸亦都以強勢嘅政治力同外交手腕，向外推銷簡化字，好多人就係擔心正體中文字被邊緣化。
我哋面對緊一場文化小革命。
台灣蔡信發教授講過佢嘅親身經歷，佢話喺一次國際研討會，大陸學者向佢私底下講話認同正體字嘅正統性同文化傳承，但係一到公開場合，同一個大陸學者又公開反對正體字，不過之後又同教授講：「昨天在會議中發生的事情，希望你不要介意。」咁重做乜嘢學者呀？
講真，我自己手寫中文都係用簡化字，冇嘅，快吖嘛。不過我知原本個字喎。所以細路一定要先學正體後學簡化。
不過我問你，𠵱家啲細路除咗考試又有幾可揸筆寫嘢？將來全中國人都會用keyboard。五筆又好、倉頡又好，一律按幾吓就搞掂，咁點解要用簡化字先？
重有，你話外國人容易學啲。廢話！
畢卡索話佢最想投胎做中國人，因為中文好鬼靚。
舉個例，個「聽」字。甲骨文「聽」字由「耳」同兩個「口」構成。意思係對耳仔聽好多口講嘅嘢，所以即係聽嘢咁解。籀文「聽」由「壬」同「耳」構成。「壬」字係話有人企喺泥上面，即係話有人企高咗聽遠啲。之後再加「直」同埋「心」。「直」字有選擇嘅意思，成個字即係話用心分析對耳聽到嘅嘢，然後自己判斷。由聽人哋講嘢重可以引伸出順從咁解。
聽話喇！你哋班「學者」聽到未呀！？
你用簡化字「听」又點解釋到咁多嘢呀？
觀火

傳真︰2623-9278
電郵︰[email protected]