記者日前隨社工徒步九層樓梯登門家訪李女士,由於梯間燈光昏暗,又放有不少垃圾雜物,沿途需小心步行;稍後記者與社工抵達「目的地」時已汗流浹背。
與女兒相依為命
李女士向記者歎謂:「呢度樓梯污穢,經常有人隨處小便;治安又差,成日有道友出入,唔係嚟撬信箱偷信,就係上天台偷衫褲。加上我住頂樓,每次出街返嚟行樓梯都行到成身汗,好辛苦!」
李女士目前與女兒相依為命,她皺着眉續說:「租私人樓,價錢平極都有限,好似呢度咁,每個月成二千幾蚊租,水、電費另計,重要畀倒垃圾費。所以最近收到通知有公屋分配畀我,我真係想即刻搬,不過一諗到搬屋要用好多錢就頭痛。」
四十歲的李女士,原從事清潔女工,婚後悉心照顧女兒及打理家務。但近年與任職機械技工的丈夫感情有變,導致婚姻破裂。「離婚後我無辦法搵到工做,惟有同囡囡靠攞綜援生活!」李女士黯然表示。