下午2時半，無敵維港景的信德大樓。

54歲賭王二房何超鳳(Daisy)，一邊化妝、一邊看文件、一邊吃貼地午餐：Pret-A-Manger $35南瓜湯。今年四月賭王何鴻燊宣佈退休，澳博主席一職交到超鳳身上，這位掌管住千億賭業的新女掌門人，罕有打開寫字樓受訪，「係辛苦，多咗嘢做，但我enjoy，我個人怕悶。」

何超鳳極少做專訪，傳媒焦點一向圍繞在大家姐何超瓊(Pansy)，或在娛樂圈的何超儀(Josie)，Daisy可說是最低調兼神秘的一個，間中會見到她在財經版出現，早前結束23年婚姻，才少有地登上娛樂版頭條。

「我大大話話幫信德做咗，唔...到明年一月一日就25年。一開首，係坐響另一邊，呢度係1997年搬嚟呢間房，坐住另一間房，爹哋幫我揀嘅另一間房就差不多25年。」是的，何超鳳最早幫手睇的家族生意，是何家大本營：信德。「我第一份工係響法國國家巴黎銀行，做咗兩年，其實唔係太辛苦，咁爹哋都召喚咗一段時段，咪返嚟，我係1994年一月一日返工，最先係做財務嘅嘢，辛苦，但好有成功感，慢慢就開始負責地產。」今年四月接掌家族另一旗艦澳博做主席，「做咗澳博兩邊走，多咗嘢做，因為係新的挑戰，希望可以跟到爹哋步伐，做得好好哋。」

Daisy和何超瓊一直孖住為賭王打理生意，過去二三十年代表二房在商場厮殺。女當家之日常？「朝早七、八點起身，做運動先，急步行一個鐘左右，差不多啦。朝早我唔化妝，唔搽嘢，我咩都唔搽，太懶了。我哋十點開工，平均做到七點，除非有約，Lunch響公司食就快啲，我唔覺辛苦，ok啦，無嘢做仲悶。」四個秘書，兩部電腦，一部主要睇住股價；跟身的兩部iPhone 24小時開住，「習慣咗，因為屋企問題，啲女響外國讀書，一個for家人，一個for公事。」忙到頭髮都無時間染，「大佬，有時間都瞓下覺啦！」

工作以外，Daisy還出任保良局副主席、香港芭蕾舞團主席，正在為HK Ballet推廣及籌款。外人眼中何超鳳很惡，很Cool，連秘書助手都不時提醒她出席活動要多啲笑容，「惡唔惡？因為我唔笑囉，其實我係一個由細到大都好怕醜嘅人，細個成日講嘢俾老竇鬧，因為我講嘢係越講越細聲。」意想不到，原來何超鳳非常貼地、非常「港」味，最大嗜好居然是看電視、煲港劇：「我最鐘意睇《愛．回家》，唔駛諗呀，又開心，又好笑，我有時真係睇到咔咔聲，有時仲會錄低佢。」周一至周五向前衝衝衝，周六日宅在家睇電視、補眠，閒時做Pilates、游水。

精明能幹的賭王女兒，Daisy一出生就Win在起跑線，跑足幾十年，要肩負家族重任及對得住股民，講求能力、耐力、毅力，還有壓力。如果，女強人和普通女人可以二選一？「其實我一向都想做個普通人，響屋企煮吓飯咁。」

採訪：林妙萍
攝影：郭賢興
攝錄：林德雄、周樂恒

精選娛聞，喺晒《娛果》
http://fb.com/appledailyent