如果香港電視嘅王維基要拍香港電影，其實大可考慮開拍《叛諜追擊5》，由該台御用「小生」林嘉華擔正，女主角待定，因為要睇吓淨心BB有冇檔期。此乃搞笑性質，如有雷同，實屬不幸。

香港電影最新呈獻—— 《叛諜追擊5之重慶拉人》 （BourneCrazy）

導演：王家衛
編劇：中情局
監製：689
映期：即日至希望永不落畫

劇情簡介：
一個美國人。一個秘密。一個人肉錄音機。一個故事。
CIA網絡技術人員愛德華斯諾登掌握美國機密，揀無可揀兼走投無路，侷住嚟「唔係好自由」嘅香港爆料，透過英國《衞報》記者格林沃爾德將事件曝光。斯諾登喺尖沙嘴美麗華爆完料後，即刻被黑、白、正、邪、忠、奸各路人馬追殺，好彩得到東方不敗阿Karl幫助，東方不敗仲提供埋私伙嘅「綠魔」裝俾佢，令佢順利闖進隔籬嘅重慶大廈，渡過咗最漫長嘅藍莓之夜……

斯諾登喺重慶大廈撞到喬寶寶，發現喬寶寶都係CIA，掌握咗唔少蘇格蘭秘密，本來諗住喺香港避難，但俾政府迫走。兩人患難見真情，喬寶寶於是叫斯諾登去麗晶賓館搵中國特務凌凌漆，以尋求政治庇護。斯諾登去到麗晶賓館，見到天姿國色、喬裝成內地性工作者嘅冰冰飯，仲問佢要北姑定陀地，斯諾登無厘頭答話： 「要庇護。」 原來冰冰飯都係中國特務嚟，諗住試探佢係咪堅係斯諾登。搞咗一大輪，斯諾登終於見到凌凌漆，點知阿漆無厘頭同佢講話: 「唔好去冰島，送你去青島。」

斯諾登懷住戰戰剋剋同失望心情去紅磡搭「2046」列車上羅湖，途中撞到CY，順便問佢點去青島，點知CY同佢講： 「無可奉告、無可奉告、無可奉告、無可奉告、無可奉告、無可奉告、無可奉告……」

角色列表
斯諾登（林嘉華飾）——冇乜點解，因為樣似《叛諜追擊》嘅麥迪文。

《衞報》記者格林沃爾德（布偉傑飾）——御用老外，冇得揀。

東方不敗阿Karl（綠魔）——原本想識斯諾登，但林嘉華都照殺。

中國特務凌凌漆（周星馳飾）——零片酬義務拍。

中國特務冰冰飯（范冰冰飾）——為求成合拍片喺內地上映，侷住用內地演員，但國際版會刪剪。

喬寶寶（喬寶寶飾）

CY（689飾）