我阿Net發覺呢兩日所有電影網都討論緊一個神秘預告片，齣戲由執導過電視劇《迷》（Lost）同《職業特工隊III》（Mission:Impossible）嘅J.J.艾布斯（J.J.Abrams）監製，幕後資料非常少，淨係知道係J.J.艾布斯為派拉蒙公司秘密炮製，戲名都未定，暫時叫做《Cloverfield》或者《1-18-08》，將於明年1月18日上映，傳聞劇情環繞巨型怪獸襲擊紐約。
預告片早前喺美國連同《變形金剛》（Transformers）一齊播放，日前喺網上公開。段片用手提攝錄機自拍，開始時影住班型男索女開歡送派對，點知玩玩吓停電，有番電後眾人喺新聞度睇到地震消息，於是走上屋頂避難。之後佢哋見到遠方帝國大廈附近發生爆炸，火舌仲橫飛擊中附近樓房。班主角即刻走落街，點知見到架車被拋上天，全城陷入恐慌，但始終見唔到隻怪獸。