半年前患上末期腎衰竭嘅王慧莉就正係急需器官移植嘅其中一人，「我自己有腎病之前曾填過器官捐贈證。但醫生話我最少要等六年，先有機會換腎。」發起今次死後捐贈器官承諾嘅「香港基督教會」，10年前曾發起「千人捐贈骨髓」，今年再次發起「二千人捐贈器官」。2,000多個基督徒噚日喺灣仔會展，由代表將9塊寫上「將身體獻上，延續生命」嘅簽名板，作為聖誕禮物送畀一名患有末期腎衰竭嘅病人代表。
本身係基督徒嘅夏之昕同太太，仲有12歲囡囡一齊簽署「器官捐贈證」。佢話基督徒相信死後，靈魂會上天堂，遺體最終只會化為塵土。佢仲話：「平日會同家人保持運動，注重健康飲食。要保持自己嘅器官喺最好嘅狀態，等接受捐贈嘅病人，得到最好嘅禮物。」