另一民主派選委更稱,他與部份民主派選委認為,應到最後一刻才決定投票策略,「最好到投票前一晚先傾」,甚至投票前一、兩小時才決定。他以過去人大選舉為例,通常不同建制陣營各有不同名單,「就算西環有名單,建制選委未必跟足」,故西環、建制隨時會配錯票,就如2002年港區人大選舉,預選排第5高票的林順潮因西環玩配票「玩出火」,結果正式投票時低票落選。
所以要攪亂西環、建制配票,民主派不能太早公開搞局策略,「點解雷動計劃可以攪亂晒民主、建制配票?因為最後一刻先叫人點投票,殺大家一個措手不及」,又指若西環信民主派追擊林、陳二人,將大量選委票倒落他們身上,「隨時令當選邊緣人數目增加,民主派可以拉人落馬嘅機會又高咗」,笑言反正民主派旨在「攪亂檔」,「搞得成固然開心,搞唔成都冇蝕底」。
季陶
周一、三、五刊出