當年今日
關於我們

【感慨唱片店買少見少】以為自己陪跑 林奕匡見老友攞獎喊出嚟

蘋果日報 2018/12/18 18:10

Robynn&Kendy露雲娜林奕匡樂壇頒獎禮菊梓喬工展會簽名會獎項hifi碟

林奕匡、菊梓喬、露雲娜今日喺工展會出席活動,講到今年樂壇頒獎禮開始,林奕匡話噚日喺「第41屆十大中文金曲頒獎典禮」中,見到朋友上台,令佢忍唔住喊咗出嚟,「Robynn & Kendy講得獎感受,我哋係好朋友,一直知佢哋好用心、好努力去做音樂,但有時付出同成果係唔成正比。」問到佢攞「CASH最佳創作歌手獎 」嘅時候有冇喊?佢話:「冇喊,但係意外,我噚日以為自己係冇獎,始終獎項又唔多,好多歌手都好出色,不過呢個獎係一個鞭策,人哋俾我嘅鼓勵。」有冇同太太一齊慶祝?佢話:「未呀,佢都有工作在身。」
對於蕭定一旗下hmv零售公佈自願清盤,林奕匡表示難免會影響歌手出實體碟,「上次我搞簽名會,我突然間好感觸,見到fans去買碟去排隊攞簽名,如果冇賣唱片嘅地方,咁何來有簽名會呢?所以我覺得係好可惜。」
露雲娜好開心表示剛喺武漢出席完一個頒獎禮,佢透露憑專輯《酒紅色的心》獲得「華語金曲年度最佳Hi-Fi人聲獎」,噚晚有冇慶祝?露雲娜話:「冇呀,好攰呀,如果慶祝呢,要飲少少紅酒,但我又唔想飲,因為好乾,怕影響把聲,今日要唱歌吖嘛!」佢透露現時正籌備下一張Hi-Fi碟。
精選娛聞,喺晒《娛果》
http://fb.com/appledailyent
empty
林奕匡、菊梓喬同露雲娜今日一齊出席活動。
empty
林奕匡話噚日攞最佳創作歌手獎感到好意外。