英超經過頭3輪聯賽，只有3支球隊仲係0分，倫敦球隊韋斯咸竟然係其中一支，領隊比歷被炒危機日益深重，下周一主場對升班馬哈特斯菲爾德，再有咩閃失，真係聞到魷魚香。韋斯咸周四都傳出喜訊，高大中鋒安祖卡路爾已經可以跟大隊練習，進度理想嘅話，有望對哈軍後備出場。

28歲嘅安祖卡路爾，自今年4月受傷後，已經冇再上陣，經過周四練習，而且軍醫檢查後，亦覺得佢冇咩問題，所以批准佢出戰下周一英超比賽。