【15:10】新增內容

人來人往嘅旺角荷李活商業中心發生偷衫案，周一(5月7日)下晝4點幾，陳先生同家人嚟到買衫，當時佢哋行到去商場地庫打算搵女裝睇吓，就喺呢個時候見到好多人企喺專賣女士服裝嘅6IXTY 8IGHT外面，佢好奇咁望入去，就見到有幾個阿Sir同Madam圍住個中年女人，當時個中年女人個樣愁到爆，嚇到面青青，係咁喺度同阿Sir求情，佢話當時聽到個女人用大陸口音嘅廣東話講咗幾次「俾次機會我，放過我啦。」

佢話，當時有阿Sir同Madam喺度，兩個阿Sir喺玻璃門旁邊Guard住個女人，個女人當時好驚青，一味喺度向阿Sir求情，講講吓仲突然跪低，見到呢一幕，佢同在場圍觀人士都嚇咗一跳，阿Sir亦即時俾唔到反應，「隔咗一陣至同個女人講，叫佢唔好咁樣，快啲起番身，有咩事番差館先講。」

佢話，聽在場小道消息話，個女人好似喺呢間6IXTY 8IGHT裡面偷衫，點知俾職員發現，當場被人截住人贓並獲，職員即刻報警處理。

陳生話，當時見到其他阿Sir同Madam喺店舖裡面同其他女職員了解事發經過。件事擾攘咗10幾分鐘，最後阿Sir幫個女人鎖上手扣拉咗，將佢押上警車帶番警署調查。

《蘋果》分別向警方同6IXTY 8IGHT了解，涉事嘅6IXTY 8IGHT職員就話唔方便回應。

警方話，噚日下晝4點幾，警方接獲荷李活商業中心一間商舖嘅女店員報案，話發現價值600幾蚊嘅衣物失竊，其間截停咗一名43歲越南籍女疑人，當場人贓並獲。警員到場調查後，以涉嫌盜竊拉咗女疑人，帶番警署繼續調查。

查翻以往報道，發現越南幫偷衫情況近年相當猖獗，好似舊年3月警方破獲一個活躍西九龍的越南偷衫黨，由主腦接order後，安排持行街紙的同黨到目標店舖偷竊，並安排贓物放喺加裝錫紙的手挽袋內。前年12月，便裝探員喺太古城H&M分店捉住一個越南拖篋男，喺篋內撿獲8000蚊贓物，經調查發現他持行街紙留港，唔排除他係受聘作案。

其實咁多單盜竊案都同越南人有關，難怪巿民對該族裔有誤解，有蘋民甚至留言：「越南黨專職偷衫，南亞專搶刧。」 而融樂會倡議主任彭婉儀指，有唔少巿民會誤會本地生活的南亞人都係好食懶做，其實大部分已落地生根，有啲會從商、進修到博士生，亦有人做地盤或服務業等基層工作，只係大家對他們了解不足所致，認為政府應該做多啲族群共融的教育宣傳。

你敢爆，我敢獎！ 即Call《蘋果》24小時爆相爆片熱線 ：63836568