利物浦延續長勝走勢，周六在英超主場以3:0大勝修咸頓，頭號球星穆罕默德沙拿也有入球，連同歐聯開季已7連勝，暫時壓過周日出場的車路士，升上聯賽榜首。至於爭標勁敵曼城，有新兵馬列斯梅開二度開齋下，作客5:0大數升班馬卡迪夫城。

紅軍領隊高路普今場採取少量輪換，新兵梳頓沙基利及今季終傷癒的祖爾麥迪比，均首次擔正，更齊齊帶來貢獻。上半場10分鐘，沙基利在左路接應沙迪奧文尼直線，純熟腳法騙過一名守將後大位起腳，怎料省中敵將沙恩朗後，再彈中另一修頓後衛韋斯利凱特後入網，紅軍便靠這個烏龍球領先。

21分鐘，紅軍增添紀錄，祖爾麥迪比接應阿歷山大阿諾特的右路角球，頭槌頂入，然後直至完半場前，沙基利罰球射中楣底彈地，穆罕默德沙拿衝前補射入網，返回更衣室前已領先3:0。

下半場，利物浦未再增添比數，但有中堅華基爾雲迪積克疑似肋骨受傷退下火線，未知是否嚴重，而紅軍便以3:0大勝修咸，各項賽事連勝增至7場。

至於周中意外在歐聯敗給里昂的曼城同樣大捷，但這場作客卡迪夫城的比賽，踢至32分鐘才開紀錄，由阿古路接應貝拿度施華傳送妙射得手，後者3分鐘後由助攻者變入球者，接應利萊辛尼的傳中頭槌跣後，反而笠死對方門將入網。44分鐘，根度簡再於禁區頂勁射死角，與紅軍一樣半場已奠定3球優勢。

換邊後，曼城再有後備上陣的馬列斯連入兩球錦上添花，最終大勝5:0，暫時升上第2位。

--------------------
荷蘭殺神[紅SP]戴維斯參戰確定！立即下載 BFB CHAMPIONS 2.0，建立你的橙衫軍！ http://bit.ly/2xrTKGM
--------------------
《體蘋果》陪你睇波講波
https://www.fb.com/appledailysports